-Οι…. σερσερήδες τη Κοσμέτε!

Όλια εποίκεν το μουνίν, έλεεν η σχωρεμέντσα η γραία η Κοντάβα, θα φυσά και τά σαχτάρια.

Αχά και τ’εμέτερον. Σεπεπί τη γενοκτονίας, έναν σουρίν εύκαιροι, σερσερήδες απαίδευτοι και αβαράδες, πού με το λύκον τρών το πρόβατον και με τον οικοκύρν εθε κάθουνταν και μοιρολογούν ατο, εφέκαν τά μπαράκια και τά μεϊχανάδες κι άμον γουτουρεμέν έτρεχαν σ’σα ράδια και ς’σά τελεοράσεις και έθαψαν κι’άλλο βαθέα τ’ αποθαμένς εμουν. Θα κουρτούν τον κόσμον, αδελφόπο μ’, άλλο μιγκίν κι παίρ’.

Αέτς ομοιάζ η δουλεία. Πώς κι οκνούν πά, ναι να ποδεδίζω τον θεόν εσουν;

Και ντο κι είπαν. Κάποιοι πά παστάν ψωνισμέν’, πού όντες ελέπνε την κεντίν ατουν ς’σόν καθρέφτην ούς τον οργασμόν εφτάνε, εποίναν εξωτερικήν πολιτικήν και εδιαρμένευαν την Τουρκίαν ντό πρέπ’ν α ευτάει. Και τ’ Ελλενικά τουν πά, να θαμάεσαι! Η λέξη «πόρτα» γράφκεται με δύο κάπα, άμον η λέξη «άλογον».

Ν’αηλί τη μαννίκα σ΄Κώστη κι αν κάτ’ παθάνς. Έλα ψή και μ’εβγαίνς κι έλα στόμαν και μη λαλείς. Θα τρακάρω και αερόσακκους πά κι’ έχω.

Είπα είναν απ’ ατουνούς οψέ κές, του χρόν’ ποίστεν έναν συνέδριον για το τσιορτάν, τά τυροκόλοθα, το χαψόφουστρον, και του Γαλέα τ’άλογον, ως αντιστάθμισμα στην γαστρονομική καπιταλιστική βαρβαρότητα, έν όψει της ενταξιακής προοπτικής της κάθ’ όλα κατάπτυστης Τουρκίας. Έει μαύρον Κρώμν. Χόψια μ’ τά κρύα τά νερά σ’, Χόψια μ’ τά χεσμοτόπια σ’, πέντε κορόσια δός και φά, δέκα δός κι άμε χέσον.

Όντες λέγω σας εγώ, ατοίν γάμεμαν εθέλναν ποίον καιρόν, λέτεν ο Κοσμέτες το στόμαν ατ’κι κρατεί.

Η αλήθεια αούτο τ’εμόν το στόμαν, στόμαν ανθρωπί πά κι ομοιάζ’, να χέζνε απές οι σκύλ’, άμαν ατά πά ντό γίνταν αδά ς’σό καταλάι ανθρωπί δουλείας κι ομοιάζνε, να χέζ απάν’ ο Κοσμέτες. Καθουμαι και νουνίζω και λέω εγώ εμέν. Oλάν αοίκον καλογάστρωτον και καλοκαντούρευτον μιλέτ να είναι αούτοιν οι Ρωμαίοι. Ρωμαίοις πά να λές ατς κρίμαν έν’. Θα σκούνταν οι Ρωμαίοι α’σά ταφία και θα ρούζνε απ’οπις εμουν. Ήντσιαν λέει ατς η ψωλή μ’ αγγούρ’ έν’, παίρνε χαμάν τ’ άλας και τρέχνε. Ευλοημέν’, νουνίστεν κι ολιγόπον.

 

δια χειρός: lafikotmisiloψit