-Η αντιπολεμική Λυσιστράτη στα ποντιακά…

Σε ελεύθερη απόδοση του Κώστα Διαμαντίδη

Γνωστός ο όρκος καθώς και το αντιπολεμικό περιεχόμενό του. Αφού  λοιπόν πληροφόρησε η Λυσιστράτη τις γυναίκες της Αθήνας για το διακύβευμα ακολούθησε  ένας έντονος διάλογος μεταξύ Λυσιστράτης και λοιπών  γυναικών ….

…………………….

ΚΛΕΟΝΙΚΗ: ….ασ’ όποιον πράμαν θα ευτάμε αποχήν ;

ΛΥΣΙΣΤΡΑΤΗ : …Ατό πα θέλ’ ερώτεμαν ; Ας’ σ’ αγουρί την καϊπανάν….

ΚΛΕΟΝΙΚΗ: Εμέν αν ερωτάς αποχήν γιόκ. Ατό ανάσπαλον ατο..καμίαν πα να μη τελείται ο πόλεμον. «τ’ εμόν η μάνα οντές χάται, μάνα ‘ς ‘σον να μην απομέν»

ΜΥΡΙΝΗ: Εγώ πα, κορίτσια σην ψωλή μ’ αν τελείται κι αν   ‘κι τελείται.

ΛΥΣΙΣΤΡΑΤΗ: Νε πουτσή, …εσύ ‘κ’ έσ’νε απράναν , νε καράκαχπε, π’  έλεες «θα κάθουμε και τσερίζ’νε με άμον χαψίν ;»

ΜΥΡΣΙΝΗ: Να τσερίζ’νε με είπα,  ‘κ’ είπα να μην τσερίζ’νε με !

ΚΛΕΟΝΙΚΗ : Το σκατό σ’ να τρώγω, Λυσιστράτη το πουλί μ’, ήντιαν άλλο θέλτς ψαλάφα με….’πε με να πορπατώ οξυπόλτενα απάν’  ‘ς  ‘σα τσιλίδια….να κουρτώ ανέψετα οφίδια….αν θέλτς τον Μητσοτάκην πιλέ ψηφίζω..Άμαν απ’ ατό ν’ αποχωρίουμαι ‘κ’ επορώ….

……………………………

ΛΑΜΠΙΤΩ: Εθαρώ κατ’ αϊκον  τσετρεφιλούκ’ έπαθεν κι ο σχωρεμένον ο Μενέλαον . Επήεν  τεά, με το   νούν ατ’ να σπάζ’ την Ελένεν κι άμον ντο είδεν τα τσιτσία ‘τ’ς  επαλαλώθεν και εκρεμίεν το μαχαίρ΄ας’ σα χέρια ‘τ’.

ΚΛΕΟΝΙΚΗ : Ατά όλια ντο λέτεν, καλά και άγια. Άμαν αν κατ’ γίνεται και κατηβάζ’νε οι αγούρ’ τα στόρια ‘τουν κι ασπαλούν τα μαγαζία ‘τουν, ετότες ντο θα γίνουμες ; Ντο θα εφτάμε ετότε ; Ατό καμίαν ενούντσετε ατο ;

ΛΥΣΙΣΤΡΑΤΗ : ‘Σ σήν ζουρνάν του πατριάρχη. Ήντιαν ευτάμε κι ατώρα. .. «χερόπο μ’ ποδεδίζω σε κουρπάν ‘ς σή γλυκασέα σ’»

ΚΛΕΟΝΙΚΗ : Φουτέσια. Κι αν πιάν’νε μας και σύρ’νε μας με το ζόρ απάν’ ‘ς σό κρεββάτ’, ατότε ντο θ’ ευτάμε ;

ΛΥΣΙΣΤΡΑΤΗ: Θ’ ασπαλούμε την πόρταν εθε

ΚΛΕΟΝΙΚΗ: Κι αν πατούνε μας ‘ς σά  ξυλέας ;

ΛΥΣΙΣΤΡΑΤΗ : Έι μωρόπον…με τα ξυλέας γαμετός κι γίνεται. Αν ‘κ’ ευτάμ’ ατ’ς να ερ’ται αίμαν ας’ σό στόμαν ατουν , εμέναν Λυσιστράτη να μη λέγ’νε με….Όσον πόσον θα ταγιανίζ’νε ; Κάποτε θα κρούγ’νε οπίσ’. Μ’είσνετεν τσεχέλ’κα. Τον άγουρον  ΄κι σαρεύει ατον ο γαμετόν όντες ‘κι θέλ’ η γαρή. Εγώ ντο λέω σας ακ’σέστεν. Ατόσα χρόνια φουρουντζής αν ‘κ’ έψεσα ψωμία. Εγώ ρίζα μ’ , τα ψωλία ντο έφαγα, έναν ξεραντέρ’ γομών’νε.

…………………..

αφού έφεραν το κρασί ξεκίνησε τον όρκο η Λυσιστράτη

…………………

ΛΥΣΙΣΤΡΑΤΗ: ….Ούλ εντάμαν θα ομνύομε. Λαμπιτώ απλώσ’τεν ουλ τα χέρια σουν απάν ‘ς ‘σο χεροχάλκ’. Είνας απ’ εσάς θα δευτερών’ ήντιαν λέγω σιφτέν εγώ. Επεκεί ούλ εντάμαν θα δίγομε τον όρκον…Αδά τερέστεν..

‘Σ ‘σα καν’νάν αρνικόν και νιά ‘ς ‘σον άντρα μ’..

ΚΛΕΟΝΙΚΗ : Σ ‘σα καν’νάν αρνικόν και νιά ‘ς ‘σον άντρα μ’..

ΛΥΣΙΣΤΡΑΡΗ : ..’κι θ’ αφήνω να φοσίζει ατο και να πατεί ατο  ‘ς  ‘σο κωλόπο μ’….’πε νε πουτσή..!

ΚΛΕΟΝΙΚΗ:.. ’κι θ’ αφήνω να φοσίζει ατο… Άχ Λυσιστράτη, εκόπαν τα γόνατα μ’ !

ΛΥΣΙΣΤΡΑΤΗ : Θα κάθουμαι απέσ’  ‘ς  σ’ οσπίτι μ’ αγάμετος..

ΚΛΕΟΝΙΚΗ : ..Θα..θα…  κάθουμαι απέσ’  ‘ς  σ’ οσπίτι μ’…  ααα.α..γάμετος

ΛΥΣΙΣΤΡΑΤΗ : …άμαν πογιατισμέντσα και αβράκωτος..

ΚΛΕΟΝΙΚΗ : …άμαν πογιατισμέντσα και αβράκωτος..

ΛΥΣΙΣΤΡΑΤΗ : Να ελέπ’ με αέτσ’ ο άντρας-ι-μ’ και να καφουρίζ…

ΚΛΕΟΝΙΚΗ : ελέπ’ με αέτσ’ ο άντρας-ι-μ’ και να καφουρίζ…

ΛΥΣΙΣΤΡΑΤΗ :  Άβουλα εμέν ‘κι θα γαμίουμαι καμμίαν..

ΚΛΕΟΝΙΚΗ :  Άβουλα εμέν ‘κι θα γαμίουμαι καμμίαν..

ΛΥΣΙΣΤΡΑΤΗ : ..ακόμαν  κι όντες θα τσακανίζ’ και πολεμά να σύρ’ με ‘ς ‘σο κρεββάτ’ με το ζόρ’..

ΚΛΕΟΝΙΚΗ : ..ακόμαν  κι όντες θα τσακανίζ’ και πολεμά να σύρ’ με ‘ς ‘σο κρεββάτ’ με το ζόρ’..

ΛΥΣΙΣΤΡΑΤΗ : Θα πατώ και σπίχκουμαι και ξάϊ ‘κι θα λαϊσκουμαι..

ΚΛΕΟΝΙΚΗ : Θα πατώ και σπίχκουμαι και ξάϊ ‘κι θα λαϊσκουμαι..

ΛΥΣΙΣΤΡΑΤΗ :  ..και νιά τ’ αντζία μ’ θα σ’κώνω αποκατάν’…

ΚΛΕΟΝΙΚΗ :  ..και νιά τ’ αντζία μ’ θα σ’κώνω αποκατάν’…

ΛΥΣΙΣΤΡΑΤΗ : ..και νιά θ’ αφήν’ ατον να σταλίζ’ ‘ς σην κεσέν , ‘αμον τα σκυλία όντες έχ’νε το κατζίον..

ΚΛΕΟΝΙΚΗ :  ..και νιά θ’ αφήν’ ατον να σταλίζ’ ‘ς σην κεσέν , ‘αμον τα σκυλία όντες έχ’νε το κατζίον..

ΛΥΣΙΣΤΡΑΤΗ : ..αούτο το κρασίν ντο πίνω, νερόν να γίνεται…

ΚΛΕΟΝΙΚΗ :  ..αούτο το κρασίν ντο πίνω, νερόν να γίνεται…….

(την κατανόησή σας για τυχόν ορθογραφικά λάθη…τα bold διαβάζονται παχιά..)